De Klapperstorch

 
De Klapperstorch kennt jedes Kind
So gut wie Rege, Schnee unn Wind.
Er hot'n spitze, lange Schnawwel,
Den braucht er nötig wie e Gawwel.
Dann er sucht kleene Kinnelcher
Aus diefe, diefe Brinnelcher,
Aus Bächelcher, so wunderschee,
Wu? weeß de liewe Gott allee !

Un hot er so e Kindel g'funne,
Do packt er's an de Ärmche unne
Unn fliegt e Zeit lang mit'm fort -
Je nooch de Aart unn nooch de Sort'.
Die korze mi'me gstauchte Hals,
Die tragt er in die Hinnerpalz,
Unn die mit lange, grade Hölzer -
Des gebt die scheene Vorderpälzer !
Hernod die liewe kleene Tröpp
Mit ausgeprägte Gorgelknöpp,
Die setzt er in e Gegend nei'
Wu's Wingert hot unn klore Wei'.
Isch de Verstand e bissel knapp,
Do schubst er se wu annescht ab,
Dann in de Palz, du liewi Zeit,
Do braucht mer norre gscheite Leit !
 


 
Zwar 's kummt aa vor so manches Mol,
Daß er eens bringt uffs Gratewohl,
Dann 's gebt in viele Pälzer Orte
E Haufe Leit vun alle Sorte.
Mir henn halt doch en klore Bode,
Wu gute Setzling fei' gerote.
Unn werd eich werklich mol eens gschenckt,
Wu nit so isch, als wie mer denkt -
Ihr liewe Leit, nor nit verzage -
Mer kann am erschte Dag nix sage !
 

Gedicht und Bilder aus Ludwig Hartmann -
Kinnersprich vum Ludewig
1920 - Verlag E. Weinhold
 

zurück