Märzeveilche

 
Juchhee! De Winter is erum,
De März is do; de Storch is kumm,
Un alle Säfte stei'e,
Mich treibs enaus ins Freie,
Mich treibs enaus in Wies un Feld,
Die Sunn schein warem in die Welt
Un weckt in mir Gefiehle
No hibsche Mäd zu schiele.

Ja, ja! mer ahnt 'es Friehjohr schun;
E Schmedderling flie't in der Sunn,
Sucht Bliemcher in de Wiese
For Honig zu genieße.
E Mädche geht an mir vorbei,
"Ei", sa' ich do, "ich sein so frei"
Un henk se fescht un warem
Schwupp! an mein rechte Arem.

Erscht hats e bisselche getrutzt,
Es hat em awer nix genutzt
Un no'me korze Weilche
Do schmunzelts mit em Mailche,
"Gell", sat se, "geh mer nit zu weit!
Ihr Mannskerl sin so beese Leit,
Aach du zählscht zu de schlimme."
Jo, denk ich, das kann stimme.

"Du", sagt se, "bei de warem Sunn
Do blihn die Märzeveilcher schun,
Am Wiesehang dohinne
Dort sin gewiß zu finne."
"Nee", sa' ich, "'s is zu frih im Johr,
Jetz kumme noch kee Veilcher vor,
Wärs bloo dei goldich Mailche,
Dann wärs e Märzeveilche."

Do hat das Mäd verschämt gelacht -
Un ich, was han ich wohl gemacht? -
Was ich han mache misse:
Ich fang se an zu kisse.
Und kiss' un kiss' ihr no un no
Die rote Lippe dunkelbloo.
Jetzt war ihr herzig Mailche
Wahrhaft e Märzeveilche.
 

 
Gedicht und Bilder aus Paul Münch -
Mei' Herzerweiterung.
Feldpostausgabe, Kaiserslautern, Dezember 1940
 

zurück