Pälzer Sache

In Deidesem
gebt's gute Neier,

In Schifferstadt
wachst feines Kraut,

Viel Bretzelbuwe
hot's in Speier,

In Böhl werd
Duwak fescht gebaut.

In Zeeskäm
wachst e feini Zwiwwel,

In Landstuhl
bad' mer sich im Moor,
For Rheumadis
isch's gut defor.

In Bermesens
hot's scheene Stiwwel,

In Edekowwe
dhut mer hannle,

In Frankethal
do macht mer Zucker,

In Derkem
wachsen sogar Mannle,

In Neustadt
hot's en Haufe Drucker,

In Jockgrim
fawriziert mer Ziggle,

Bergzawwere,
des muß mer sehe,
dort kammer
fei spaziere gehe.

In Lautre feine
Schränk unn Dischle,

In Bellem schmackt
des Bier so frisch,

Zweebricke,
des isch allbekannt
als scheenschti Stadt
im Hinnerland.

In Germeschem
gebt's klore Fisch,

St. Ingbert  gebt
uns Glas unn Kohle,

In Lambrecht
werd Gedüch gemacht,

In Lambsem
kammer Spargle hole,

In Maxdorf
werren Gänsle gschlacht,

In Heidelberg
hot's viel Studente,

In Freensem
wachst e feini Kersch,

In Mannem
red' mer vun Prozente,

In Mutterstadt
hot's Reh unn Hersch,

In Landa sinn
die breetschte Strooße,

In Hetterem
gebt's Ton unn Sand -
mer macht do draus
so allerhand.

In Mackebach
werd viel gebloose,

In Grünstadt
näht mer scheene Hefte,

In Zell
de Parrer möcht ich sei' -
dem wachst de Wei'
ins Kerchel nei' !

In Ludwigshafe
macht mer Gschäfte,

O Pälzerland, so wunnerbar !
Ach, wär's Babier nor nit so rar,
Do dhet ich als so weiter mache
Mit uns're scheene Pälzer Sache !
Drum was ich hab vergesse heit,
Kummt's nägschte Mol, ihr liewe Leit !

Gedicht und Bilder aus Ludwig Hartmann -
Kinnersprich vum Ludewig
1920 - Verlag E. Weinhold