|
Was sin doch jetzt die Baure stolz,
Ob's ins Feld geht oder ins Holz,
In aller Früh schun rattert de Motor,
Zum Tor naus geht's mit em Traktor.
Hinnedran hängt, was mer braucht,
Was for die neue Zeit so taucht.
Traktor vorne, Traktor hinne,
Wu kann mer noch en Bauer finne,
Der nit schont sei eigni Kraft
Un nit mit so em Traktor schafft.
De Traktor frißt nix, wann er steht,
Doch wann de Traktor widder geht,
Braucht er Öl un braucht Benzin.
Dann kummt en Tag, do isch er hin.
Jetzt werd de Traktor reparirt,
Werd uffgebügelt un werd g'schmiert,
Des koscht Geld, do muß mer spare,
Daß so en Traktor kann ach fahre. -
Un wammer des so recht bedenkt,
Was do die Technik uns hott g'schenkt,
Un uns das Läwe leicht zu mache,
Do kann mer sage, des sin Sache. -
Doch's Knottelbüwel loßt's nit gelte,
Hinnenooch, do dhut er schelte,
"Ihr, mit eure Deifelssache,
Nit mol Knottle kinn ihr mache." -
Früher in de alte Zeit,
Do henn die alte Bauersleit,
So en anre Traktor g'hatt,
Mit em sauwre Fell, so zart un glatt,
Vier Bän, 1 PS isch's geloffe
Un immer war noch voller Hoffe,
De Bauer uff e klän Traktorle,
E Füchsel, Bräunel oder e Mohrle,
Wu de Alt uff d' Welt g'setzt hott.
Des war e Fräd, du liewer Gott.
Des hott mer uffgezoche, hott's gedaaft
Un später hott mer's dann verkaaft.
Des war for so en Bauer Spaß,
Do hott's gerappel in de Kass.
Dann darf mer des ach nit vergesse,
Die Traktorle, die henn Hawre g'fresse,
Hot Häcksel, Hä un Gras geknawert,
En Amer Wasser nunnerg'schlawert
Un henn noch Mischt dezu gemacht.
In jedem Hof, des war e Pracht,
So en Haufe Mischt zu sehne,
So en goldig, gäle, so en schäne.
Do hott mer d' Äcker mit gedüngt,
Daß die Ernt ach ebbes bringt
Un g'sundi War werd uffgetischt,
Annerscht, wie mit künstlich Mischt.
G'sundi War un g'sunde Leit,
So war des in de alte Zeit,
Doch heut in der Traktore Eil,
Werr'n immer weniger Küh un Gail.
|